Naga Chaitanya : ఏ మాయ చేశావే చిత్రంలో నాగ చైతన్య, సమంత క‌లిసి న‌టించగా ఈ మూవీ షూటింగ్ స‌మ‌యంలోనే వీరిద్ద‌రి మ‌ధ్య పరిచయం ఏర్ప‌డి అది ప్రేమ‌గా మారింది. ఎట్ట‌కేలకు వీరు 2017లో పెళ్లి చేసుకొని 2021 అక్టోబ‌ర్ 2న విడాకులు తీసుకున్నారు. అయితే వీరిద్ద‌రు క‌లిసి న‌టించిన తొలి చిత్రం ఏ మాయ చేశావే కాగా, ఈ మూవీ 13 ఏళ్లు పూర్తి చేసుకుంది. 2010లో వచ్చిన ఈ సినిమాకు గౌతమ్ వాసుదేవ్ మీనన్ దర్శకత్వం వహించారు. సూపర్ స్టార్ మహేష్ బాబు అక్క మంజుల దేవి నిర్మించిన ఈ లవ్ అండ్ రొమాంటిక్ డ్రామాలో సామ్.. చైతూ కెమిస్ట్రీ ప్రేక్షకులను ఆకట్టుకుంది.
ఏ మాయ చేశావే చిత్రం తర్వాత వీరి కాంబోలో ఆటోనగర్ సూర్య, మజిలీ, మనం, ఓ బేబీ చిత్రాలు వచ్చాయి. అయితే ఏ మాయ చేశావే చిత్రం విడుద‌లై 13 ఏళ్లు అయిన సందర్భంగా సమంత అభిమానులను ఉద్దేశించి ఇన్‌స్టాగ్రామ్‌లో ఎమోషనల్‌ పోస్ట్ పెట్టింది. తనపై ప్రేమను చూపిస్తోన్న అభిమానులకు కృతజ్ఞతలు తెలిపింది. వాళ్ల ప్రేమ వల్లే తాను ఈ స్థాయిలో ఉన్నానని.. ఇది ఎప్పటికీ ఇలాగే ఉండాలని అని చెప్పింది.. ఇక ‘ఈ జర్నీలో ఎన్నో విషయాలు నన్ను బాధించాయి. ఇకపై ఏదీ నన్ను బాధపెట్టదు. కేవలం అభిమానుల ప్రేమ, కృతజ్ఞతతో ఇలా కొనసాగుతున్నాను అని స్ప‌ష్టం చేసింది.
నేను ఎంత ఎదిగినా.. ఎంత దూరం ప్రయాణించినా.. అభిమానులు చూపించే ప్రేమాభిమానాన్ని మర్చిపోలేను. అలాగే, నాకు కొత్త విషయాలను పరిచయం చేస్తోన్న ప్రతిరోజుకూ థ్యాంక్స్‌’ అంటూ సమంత త‌న పోస్ట్‌లో పేర్కొంది. ఇక సోష‌ల్ మీడియాలో పెద్ద‌గా యాక్టివ్‌గా ఉండ‌ని నాగ చైతన్య కూడా స‌మంత‌తో క‌లిసి ఉన్న ఫొటోని షేర్ చేస్తూ… ‘ఏ మాయ చేశావె’ మూవీ 13 ఏళ్లు అంటూ కామెంట్ పెట్టాడు. విడాకుల తర్వాత చైతూ త‌న సోష‌ల్ మీడియాలో సమంత ఫొటోని షేర్ చేయ‌డం ఇప్పుడు చ‌ర్చ‌నీయాంశం అయింది. అయితే సమంత మాత్రం నాగ చైతన్య ఉన్న పోస్టర్ కాకుండా జెస్సి పోస్టర్స్ మాత్రమే షేర్ చేసింది. ఇందుకు మరో కారణం ఉన్నట్లుగా తెలుస్తోంది. సమంత కథానాయికగా అడుగుపెట్టి 13 ఏళ్లు పూర్తైన సందర్భంగా తనకు గుర్తింపు తీసుకువచ్చిన జెస్సీ పాత్రకు సంబంధించిన ఫోటోస్ మాత్రమే పంచుకొని ఉంటుందంటున్నారు.
