Kangana Ranaut : రోజా ఎవ‌రో నాకు తెలియ‌దు.. కంగ‌నా ర‌నౌత్ అలా అనేసింది ఏంటి..?

Kangana Ranaut : ప్రముఖ నటిగా, ఏపీ మంత్రిగా ఉన్న రోజా గురించి తెలుగు రాష్ట్రాల వారికి ప్ర‌త్యేక ప‌రిచ‌యం అక్క‌ర్లేదు. ఆమెకి త‌మిళ‌నాటు కూడా మంచి ఫాలోయింగ్ ఉంది. అయితే తాజాగా బాలీవుడ్ బ్యూటీ కంగ‌నా ర‌నౌత్ త‌న‌కు రోజా ఎవ‌రో తెలియ‌దంటూ ఆస‌క్తిక‌ర కామెంట్స్ చేసి అంద‌రికి షాక్ ఇచ్చింది. బాలీవుడ్‌ నటి కంగనా రనౌత్ పి వాసు దర్శకత్వంలో చంద్ర‌ముఖి 2 చిత్రం చేయ‌గా, ఇందులో లారెన్స్ ప్ర‌ధాన పాత్ర పోషించారు. సెప్టెంబర్ 15న ప్రేక్షకుల ముందుకు రానున్న ఈ సినిమాకి సంబంధించి జోరుగా ప్ర‌మోష‌న్స్ జ‌రుగుతున్నాయి. ఈ క్ర‌మంలో చెన్నైలో మీడియా అడిగిన పలు ప్రశ్నలకు చిత్ర బృందం సమాధానాలు ఇచ్చింది.

ఈ క్రమంలోనే కంగనా రనౌత్ రాజకీయాల గురించి ఆసక్తికర వ్యాఖ్యలు చేశారు. తనకు అవకాశం వస్తే రాజకీయాల్లోకి వస్తానని చెప్పారు. అయితే ఈ క్రమంలోనే మీడియా ప్రతినిధులు అడిగిన ప్రశ్నలకు సమాధానమిచ్చిన కంగనా రనౌత్.. ఏపీ మంత్రి రోజా ఎవరో తనకు తెలియదని అన్నారు. ఏపీ మంత్రి రోజా జనసేనాని పవన్ పైన చేసిన వ్యాఖ్యలపైన కంగనా కామెంట్స్ సినీ, పొలిటికల్ సర్కిల్స్ లో చర్చకు కారణమయ్యాయి. రాజకీయాల్లోకి వస్తే సినిమాలు వదులుకోవాలంటూ జనసేన అధినేత పవన్‌ కల్యాణ్‌ను ఉద్దేశించి ఏపీ పర్యాటకశాఖ మంత్రి, నటి రోజా చేసిన వ్యాఖ్యలను విలేకరులు కంగ‌నా ర‌నౌత్ ద‌గ్గ‌ర‌ ప్రస్తావించగా.. ”రోజా అంటే ఎవరు? అలాంటివారు ఉన్నారన్న విషయమే నాకు తెలియదు. ఆమె గురించి నేనేం మాట్లాడతానని కంగనా ప్రశ్నించారు.

రోజా గురించి కంగనా చేసిన వ్యాఖ్యలు సోషల్ మీడియాలో వైరల్ అవుతున్నాయి. ఈ వ్యాఖ్యలపైన రోజా ఏమ‌న్నా రియాక్ట్ అవుతుందా లేదా అనేది చూడాలి. ఇక కంగ‌నా ర‌నౌత్.. తాను అసలు సిసలైన దేశ భక్తురాలినని పేర్కొన్నారు. అందుకే తనవంతుగా పేదలకు తోచిన సాయం చేస్తున్నానని తెలిపారు. బాలీవుడ్ కాంట్రవ‌ర్షియ‌ల్ క్వీన్‌గా మారిన కంగ‌నా ర‌నౌత్.. ఎప్పుడు ఏదో ఒకవివాదంతో వార్త‌ల‌లో నిలుస్తుంటుంది.