Chinmayi : సింగర్, డ‌బ్బింగ్ ఆర్టిస్ట్ చిన్మయి గురించి ప్ర‌త్యేక ప‌రిచ‌యాలు అక్క‌ర్లేదు. మహిళలపై జరిగే వేధింపుల విషయంలో చిన్మయి ఫైర్ బ్రాండ్ గా మారిపోయి అంద‌రి దృష్టిని ఆక‌ర్షిస్తూ ఉంది. మహిళలని అవమానించేలా చిన్న సంఘటన జరిగినా చిన్మయి వెంట‌నే స్పందిస్తుంది. మీటూ ఉద్యమం చెలరేగినప్పుడు చిన్మయి తమిళ లిరిసిస్ట్ వైరముత్తుపై తీవ్రమైన వ్యాఖ్యలు చేసిన సంగతి తెలిసిందే. వైరాముత్తు తనని లైంగికంగా వేధించినట్లు చిన్మయి సంచలన ఆరోపణలు చేసింది. అప్పటి నుంచి ఈ వివాదం రగులుతూనే ఉంది. వైరముత్తుపై చిన్మయి త‌నవంతుగా పోరాడుతూనే ఉంది.
సందర్భం వచ్చిన ప్రతిసారి చిన్మయి వైరముత్తుపై ఏదో ర‌క‌మైన కామెంట్స్ చేస్తూనే ఉంది. తాజాగా చిన్మయి.. వైరముత్తు వ్యవహారంలో ఏకంగా కమల్ హాసన్ ని టార్గెట్ చేస్తూ దారుణ‌మైన కామెంట్స్ చేసింది. ఇండియన్ రెజ్లర్లు వేధింపులకు వ్యతిరేకంగా గత నెల రోజులకు పైగా నిరసనలు చేపడుతున్న విష‌యం తెలిసిందే. భారత రెజ్లింగ్‌ ఫెడరేషన్‌ అధ్యక్షుడు బ్రిజ్‌భూషణ్‌ వేధింపులకు వ్యతిరేకంగా మహిళా రెజర్లర్లు రోడ్డుపైకి వ‌చ్చి నిరసనలు తెలియ‌జేస్తున్నారు. అయితే నరేంద్ర మోదీ ప్రభుత్వం మాత్రం తమ ఎంపీని పల్లెత్తు మాట కూడా అనడం లేదు. అటు రెజర్లర్లు మాత్రం నిరసనను కొన‌సాగిస్తూనే ఉన్నారు. అయితే తాజాగా వారి నిరసన మీద కమల్ హాసన్ స్పందించాడు.
ఈ రోజుకు రెజ్లర్లు నిరసన చేస్తూ నెల రోజులు దాటేసింది.. వాళ్లు మన దేశ పతాకం కోసం పోరాడాలి.. కానీ వారిని వారు కాపాడుకునేందుకు పోరాటం చేయాల్సి వస్తోంది.. అంటూ వారికే తన మద్దతు అని కమల్ హాసన్ ట్వీట్ చేశాడు.. ఈ ట్వీట్ మీద చిన్మయి మండి పడింది. తన బాధనంతా ట్వీట్ రూపంలో పెట్టేసింది. ఇప్పుడు ఆ ట్వీట్ వైరల్ అవుతోంది. మహిళలపై వేధింపులకు పాల్పడిన వ్యక్తిని ప్రశ్నించినందుకు తమిళనాడులో ఓ మహిళా సింగర్ 5 సంవత్సరాల పాటు నిషేదానికి గురైంది. ఈ సంఘటన వారి కళ్ళముందే జరిగింది క‌దా. కానీ ఆ రచయితతో ఉన్న పరిచయం కారణంగా దానిపై ఎవరూ స్పందించరు. తమ చుట్టూ జరిగే సంఘటనలని పట్టించుకోకుండా మాట్లాడే రాజకీయ నాయకులని ఎలా నమ్మాలి అంటూ చిన్మయి కమల్ హాసన్ ఉద్దేఇశిస్తూ ట్వీట్ ని పోస్ట్ చేసింది.
