YS Sharmila : తెలంగాణలో వైఎస్సార్టీపీ పేరుతో పొలిటికల్ ఎంట్రీ ఇచ్చి ఆ తర్వాత కాంగ్రెస్ లో దాన్ని విలీనం చేసింది వైఎస్ షర్మిల.. కాంగ్రెస్ పార్టీకి తన ఎంట్రీ జీవం పోస్తుందని హైకమాండ్ తో పాటు మెజార్టీ నేతలు లెక్కలేసుకుంటున్నా.. పార్టీలో సహజంగానే తన కుటుంబంపై దీర్ఘకాలంగా వ్యతిరేకత పెంచుకున్న నేతల్ని దారిలోకి తెచ్చుకోవడం ఇప్పుడు షర్మిలకు సవాలుగా మారింది. వాస్తవానికి వైఎస్సార్ తెలంగాణ పార్టీని కాంగ్రెస్ పార్టీలో విలీనం చేసి తెలంగాణ రాజకీయాల్లో కీలకంగా వ్యవహరిద్దమనుకున్న వైఎస్ షర్మిలకు ఆక్కడి సీనియర్లు మోకాలడ్డారు. రేవంత్ రెడ్డి సహా అందరూ ఆమెను వ్యతిరేకించడంతో తెలంగాణ ఎన్నికలకు ముందే జరగాల్సిన పార్టీ విలీన ప్రక్రియ నిలిచిపోయింది.
అయినా ఆమెకు కాంగ్రెస్ పార్టీ మార్క్ రాజకీయాలు అర్ధం కాలేదు. ఆ ఎన్నికల్లో పోటీ చేయకుండా కాంగ్రెస్ పార్టీకు బాహాటంగా మద్దతు తెలిపింది. ఇక ఆ తరువాత ఏపీ ఎన్నికలు దగ్గరపడుతున్నాయనగా మళ్లీ కాంగ్రెస్ పార్టీ ఆమెతో సంప్రదింపులు జరిపింది. ఏపీలో కనీసం ఉనికి కాపాడుకునేందుకు ఆమె అవసరం ఏర్పడినట్టుంది. హుటాహుటిన పిలిపించుకుని హామీలిచ్చి..పార్టీ కండువా కప్పుకునేలా చేసింది. తన పీసీసీ ఛీఫ్ పదవిని ప్రకటించేందుకు అధిష్టానానికి ఎదురవుతున్న అడ్డంకుల్ని తానే క్లియర్ చేసుకునేందుకు వైఎస్ షర్మిల ప్రయత్నాలు ప్రారంభించారు. ఓవైపు కుమారుడు రాజారెడ్డి పెళ్లి ఏర్పాట్లలో బిజీగా ఉంటూ ఆహ్వానపత్రికలు పట్టుకుని ముఖ్య నేతల ఇళ్లకు తిరుగుతున్న షర్మిల.. మరోవైపు కాంగ్రెస్ నేత రాహుల్ గాంధీ భారత్ జోడో న్యాయ్ యాత్ర ప్రారంభంలోనూ కనిపించారు.
మరోవైపు ఏపీలో సొంత పార్టీలో తనకు ఏమాత్రం వ్యతిరేకత లేకుండా చూసుకున్నాకే పీసీసీ ఛీఫ్ పోస్టు వచ్చేలా చూసుకోవాలని భావిస్తున్న వైఎస్ షర్మిల ఇందులో భాగంగా తనపై వ్యతిరేకత గళం వినిపిస్తున్న, లోలోపల అసంతృప్తులుగా ఉన్న వారిని గుర్తించి వాళ్లను చేరువయ్యేందుకు ప్రయత్నిస్తున్నట్టు స‌మాచారం. మరోవైపు ష‌ర్మిలని ప్ర‌చారానికి మాత్ర‌మే కాంగ్రెస్ వాడుకోవాల‌ని భావిస్తుంద‌ని, మార్చి వ‌ర‌కు కొడుకు పెళ్లి ప‌నుల‌తో షర్మిల బిజీగా ఉంటున్న నేప‌థ్యంలో ఆమె ఈ సారి పోటీ చేసే అవ‌కాశం ఉండ‌క‌పోవ‌చ్చ‌ని టాక్ నడుస్తుంది. మ‌రి దీనిపై క్లారిటీ రావల‌సి ఉంది.
