ఆస్ట్రేలియాలో జరుగుతున్న ఐసీసీ టీ20 వరల్డ్ కప్ 2022లో అనూహ్య పరిణామం చోటు చేసుకుంది. గెలుస్తుందనుకున్న సౌతాఫ్రికా జట్టు ఓడిపోయింది. పసికూన నెదర్లాండ్స్ చేతిలో ఓటమి పాలైంది. గెలిస్తే సెమీస్కు వెళ్లే చక్కని అవకాశాన్ని సౌతాఫ్రికా మిస్ చేసుకుంది. ఎప్పటిలాగే ఒత్తిడికి లొంగిపోయింది. ఈ క్రమంలోనే సౌతాఫ్రికాపై నెదర్లాండ్స్ 13 పరుగుల తేడాతో విజయం సాధించింది. దీని వల్ల పాక్కు సెమీస్ మార్గం మరింత సులభమైంది. ఆ జట్టుకు లక్ కలసి వచ్చినట్లయింది.
మ్యాచ్లో టాస్ గెలిచిన సౌతాఫ్రికా మొదట ఫీల్డింగ్ తీసుకోగా.. నెదర్లాండ్స్ బ్యాటింగ్ చేపట్టింది. ఈ క్రమంలోనే నెదర్లాండ్స్ జట్టు నిర్ణీత 20 ఓవర్లలో 4 వికెట్ల నష్టానికి 158 పరుగులు చేసింది. ఆ జట్టు బ్యాట్స్మెన్లలో కోలిన్ అకర్మన్ 41 పరుగులతో నాటౌట్ నిలవగా, టామ్ కూపర్ 35 పరుగులు చేశాడు. స్టీఫెన్ మైబర్గ్ 37 పరుగులు సాధించాడు. సౌతాఫ్రికా బౌలర్లలో కేశవ్ మహరాజ్ 2 వికెట్లు తీశాడు. అన్రిచ్ నొర్జె, ఎయిడెన్ మార్కరమ్లు చెరో వికెట్ తీశారు.
అనంతరం బ్యాటింగ్ చేసిన సౌతాఫ్రికా 20 ఓవర్లలో 8 వికెట్ల నష్టానికి 145 పరుగులు మాత్రమే చేయగలిగింది. ఆ జట్టు బ్యాట్స్మెన్లలో ఎవరూ ఆకట్టుకునే ప్రదర్శన చేయలేకపోయారు. ఎప్పటికప్పుడు వికెట్లను కోల్పోతూ వచ్చారు. దీంతో నెదర్లాండ్స్ పెద్దగా కష్టపడకుండానే సునాయాసంగా విజయం సాధించింది. నెదర్లాండ్స్ బౌలర్లలో బ్రాండన్ గ్లోవర్ 3 వికెట్లు తీయగా, బస్ డి లీడి, ఫ్రెడ్ క్లాసెన్లు చెరో 2 వికెట్లు సాధించారు. అలాగే మీకెరెన్కు 1 వికెట్ దక్కింది.
ఈ మ్యాచ్లో గెలిస్తే సౌతాఫ్రికా నేరుగా సెమీస్కు వెళ్లి ఉండేది. మొదటి లేదా రెండో స్థానంలో నిలిచేది. కానీ పసికూన జట్టు చేతిలో ఓటమి కారణంగా సెమీస్ ఆశలు గల్లంతు అయ్యాయి. దీంతో పాకిస్థాన్, బంగ్లాదేశ్లకు అవకాశం దక్కింది. ఈ రెండు జట్లలో గెలుపొందిన జట్టు సెమీస్కు చేరుకుంటుంది. కనుక పాక్, బంగ్లా రెండు జట్లకు చాన్స్ ఉందని చెప్పవచ్చు.
