ఆలయాల్లో అందించే ప్రసాదంలా పులిహోర రావాలంటే.. ఇలా తయారు చేయాలి..!

తెలుగు వారికి పులిహోర గురించి ప్రత్యేకంగా చెప్పాల్సిన పనిలేదు. దీన్ని ఆలయాల్లో ఎక్కువగా ప్రసాదంగా అందిస్తుంటారు. అలాగే శుభ కార్యాలు జరిగినప్పుడు కూడా దీన్ని భోజనంలో వడ్డిస్తుంటారు. అయితే ఎంత ప్రయత్నించినా కొందరికి మాత్రం పులిహోరను ఆలయాల్లో మాదిరిగా తయారు చేయడం రాదు. కానీ కింద తెలిపిన విధానాన్ని తూ.చా. తప్పకుండా పాటిస్తే దాంతో పులిహోర ఎంతో రుచిగా తయారవుతుంది. ఇలా తయారైన పులిహోరను అందరూ ఎంతో ఇష్టంగా తింటారు. ఇక ఆలయాల్లో ఉండే విధంగా పులిహోరను ఎలా తయారు చేయాలో ఇప్పుడు తెలుసుకుందాం.

పులిహోర తయారీకి కావల్సిన పదార్థాలు..

అన్నం – పావు కిలో, చింతపండు – 50 గ్రాములు, పసుపు – ఒక టీస్పూన్‌, ఉప్పు – రుచికి సరిపడా, కరివేపాకు రెబ్బలు – రెండు, చీల్చిన పచ్చి మిర్చి – మూడు, ఆవాలు – రెండు టేబుల్‌ స్పూన్లు, అల్లం – చిన్నముక్క, ఎండు మిర్చి – రెండు, బెల్లం పొడి – ఒక టీస్పూన్‌.

రెండో తాళింపు కోసం..

వేరుశెనగపప్పు – పావు కప్పు, మినప పప్పు, శెనగపప్పు – ఒక టేబుల్‌ స్పూన్‌ చొప్పున, ఎండు మిర్చి – 5, కరివేపాకు – రెండు రెబ్బలు, ఇంగువ, బెల్లం పొడి – చిటికెడు.

పులిహోరను తయారు చేసే విధానం..

అన్నాన్ని కాస్త పలుగ్గా వండుకోవాలి. చింతపండును వేడి నీళ్లలో వేసి నానబెట్టాలి. అన్నం వేడిగా ఉన్నప్పుడే దాని మీద పసుపు, ఉప్పు వేసుకోవాలి. దీంట్లోనే కరివేపాకు, పచ్చి మిర్చి వేయాలి. కొంచెం వేరుశెనగ నూనె లేదా నువ్వుల నూనె పోసి అన్నానికి పట్టేలా పైపైన కలపాలి. ఇప్పుడు ఆవాలు, అల్లం, ఎండు మిర్చిని మిక్సీ జార్‌లో వేసి కొద్దిగా ఉప్పు వేసి మెత్తని పేస్టులా చేయాలి. దీంట్లో ఉప్పు వేయడం వల్ల వగరు రాకుండా ఉంటుంది.

స్టవ్‌ మీద కడాయి పెట్టి నూనె పోసి వేడి చేసి ఆవాలు, కొంచెం కరివేపాకు వేసి వేయించాలి. దీంట్లో చింతపండు పులుసు పోసి అది గుజ్జుగా అయ్యేంత వరకు మరిగించాలి. దీంట్లోనే కొద్దిగా బెల్లం పొడిని వేస్తే పులిహోర మరీ పుల్లగా ఉండదు. పులుసు దగ్గరగా అయిన తరువాత దీంట్లో ఆవాల పేస్టు వేసి ఉడికించాలి. తరువాత చల్లారిన అన్నాన్ని దీంట్లో వేసి మళ్లీ రెండో తాళింపు వేయాలి. దీని వల్లే పులిహోరకు అదనపు రుచి వస్తుంది.

కడాయిలో నూనె పోసి వేడి చేసి ఆవాలు వేసి అవి చిటపటలాడాక వేరుశెనగపప్పు, మినప పప్పు, శనగపప్పు వేయాలి. దీంట్లోనే ఎండు మిర్చి, కరివేపాకు వేసి బాగా వేయించాలి. బాగా వేగిన తరువాత ముందు సిద్ధం చేసిన అన్నంలో వీటిని వేసి కలిపి రెండోసారి తాళింపులా వేయాలి. ఇలా చేస్తే పులిహోరకు బాగా రుచి వస్తుంది. ఇది అచ్చం ఆలయాల్లో అందించే ప్రసాదంలా ఉంటుంది. దీన్ని అందరూ ఎంతో ఇష్టంగా తింటారు.