నందమూరి బాలకృష్ణ, శృతి హాస‌న్ ప్ర‌ధాన పాత్ర‌ల‌లో గోపిచంద్ మ‌లినేని తెర‌కెక్కించిన చిత్రం వీరసింహారెడ్డి. సంక్రాంతి కానుకగా ఈనెల 12న ప్రేక్షకుల ముందుకు వస్తోంది. ఈ సినిమాలో బాలకృష్ణ రెండు విభిన్నమైన పాత్రల్లో కనిపించనున్నారు. కన్నడ హీరో దునియా విజయ్ ఈ సినిమాలో ప్రతినాయకుడి పాత్ర పోషించారు. ఈ సినిమా కోసం నందమూరి అభిమానులు క‌ళ్తు కాయ‌లు కాచేలా ఎదురు చూస్తున్నారు. సినిమా ఎప్పుడు రిలీజ్ అవుతుందా అని ఆస‌క్తిగా గ‌మ‌నిస్తున్నారు. అయితే ‘వీరసింహారెడ్డి’ విడుదలకు మూడు రోజుల ముందే ఈ సినిమా ఫస్ట్ రివ్యూ వచ్చేసింది.
దుబాయ్‌లో ఉంటూ ఓవర్సీస్ సెన్సార్ బోర్డు సభ్యుడిగా చెప్పు కునే ఉమైర్ సంధు సౌత్ ఇండియాలో విడుదలయ్యే అన్ని సినిమాలకు సంబంధించి చాలా ముందుగానే రివ్యూలు ఇచ్చేస్తుంటాడు .తమిళ సినిమాలు ‘వారిసు’, ‘తునివు’ ఫస్ట్ రివ్యూలు ఇచ్చేసిన ఆయన తాజాగా ‘వీరసింహారెడ్డి’ ఫస్ట్ రివ్యూ కూడా ఇచ్చాడు. బాలయ్య సినిమాకు 3.5 రేటింగ్ ఇచ్చిన ఉమైర్.. సినిమాలోని అంశాల గురించి మాత్రం రెండు రకాలుగా రాసుకొచ్చాడు. సినిమాలోని కథ, కథనం కొత్తగా ఏమీ లేకపోయినా.. సినిమా మాత్రం ఎంగేజింగ్‌గా, టైమ్‌పాస్ అయ్యే విధంగా ఉంటుంద‌ని అన్నాడు.
ఇక సినిమాకు బాలకృష్ణ మూలస్తంభంలా నిలబడ్డాడ‌ని ఆయన మరో వైవిధ్యమైన పాత్రలో కనిపించడమే కాకుండా అద్భుతమైన నటనను కనబరిచార‌ని చెప్పుకొచ్చాడు.. బాలకృష్ణ తన పంచ్ డైలాగులతో అలరించడమే కాదు.. తన భావోద్వేగ నటనతో కన్నీళ్లు పెట్టించారు. అలాగే ఈ స్టార్ హీరో డాన్సులు కుమ్మేశారు. పాటలకు ఆయన అభిమానులకు పండగ వాతావరణాన్ని తీసుకొస్తాయి. ఆఖరి 15 నిమిషాలు సినిమా అద్భుతం. మొత్తంగా చూసుకుంటే ఇది పైసా వసూల్ మాస్ మూవీ’’ అని ఉమైర్ సంధు తన ఇన్‌స్టాగ్రామ్ స్టోరీలో తెలియ‌జేశాడు.వీరసింహారెడ్డి’ సినిమాలో వరలక్ష్మీ శరత్‌కుమార్ కీలక పాత్ర పోషించారు. చంద్రిక రవి స్పెషల్ సాంగ్ చేశారు. ఈ చిత్రానికి రిషి పంజాబీ సినిమాటోగ్రఫీ అందించగా.. థమన్ సంగీతం సమకూర్చారు. సాయి మాధవ్ బుర్రా డైలాగ్స్ రాశారు.
