Ambati Rayudu : భార‌త మాజీ క్రికెట‌ర్ అంబటి రాయుడు ఇటీవ‌ల ఐపీఎల్‌కి కూడా గుడ్ బై చెప్పిన విష‌యం తెలిసిందే. ప్ర‌స్తుతం ఆయన తన దృష్టంతా రాజ‌కీయాల‌పై పెట్ట‌బోతున్న‌ట్టు తెలుస్తుంది. ఇటీవ‌ల వైఎస్ జగన్ని కూడా క‌లిసారు. దీంతో అంబటి రాజ‌కీయాల‌లోకి రావడం ఖాయం అంటూ కొంద‌రు డిసైడ్ అయిపోయారు. ఇక ఇటీవ‌ల అంబటి రాయుడు ఓ టీవీ ఛానెల్‌లో సంచ‌ల‌న వ్యాఖ్యలు చేశారు. తనను 2019 వరల్డ్ కప్‌కి ఎంపిక చేయకపోవడంపై అంబటి రాయుడు తొలిసారి పెదవి విప్పాడు. 2019 వరల్డ్ కప్ కోసం తాను నాలుగేళ్ల ముందు నుంచే సన్నద్ధం అయ్యానని రాయుడు చెప్పాడు.
2018లో బీసీసీఐ నుంచి వరల్డ్ కప్ కోసం ప్రిపేర్ కావాలనే సంకేతాలు అంద‌గా, వరల్డ్ కప్‌కి ముందు మాత్రం తనను ఎంపిక చేయరనే సంకేతాలు కనిపించాయని రాయుడు చెప్పాడు. ఐపీఎల్ సమయంలో విమానం దిగి ఫోన్ స్విచ్ఛాన్ చేయగానే.. వరల్డ్ కప్ కోసం ప్రకటించిన జట్టులో తన పేరు లేదని తెలిసి చాలా బాధ‌ప‌డ్డాన‌ని ఆయన అన్నారు. నాలుగో స్థానం కోసం తనను ఎంపిక చేయాలని అనుకున్నారని.. ఆ స్థానానికి సరిపడే రహానే లాంటి మరో బ్యాటర్‌ను తీసుకుంటే ఫర్వాలేదు కానీ.. ఆల్‌రౌండర్‌ను ఎంపిక చేయడం ఆశ్చర్యపరిచిందన్నాడు. ఆరంభంలోనే వికెట్లు పడితే.. పరిస్థితిని చక్కదిద్దేందుకు నాలుగో స్థానంలో సీనియర్ ఆటగాడు కావాలి.. కానీ 6-7వ స్థానంలో బ్యాటింగ్‌కు దిగే ఆల్‌రౌండర్‌ను ఎంపిక చేశారని రాయుడు తెలిపాడు.
విజయ్ శంకర్ మీద నాకు ఎలాంటి కోపం లేదు. పాపం తనేం చేశాడు. జట్టుకి ఎంపిక చేశారు.. అతడు ఆడాడు. కానీ వీళ్లు వరల్డ్ కప్‌కి వెళ్తున్నారా..? లేదా లీగ్ మ్యాచ్‌కు వెళ్తున్నారా అనిపించింది’ అని రాయుడు తెలిపాడు. అయితే రాయుడిని ఎంపిక చేయ‌క‌పోవ‌డం వెన‌క అప్పటి చీఫ్ సెలక్టర్ ఎమ్మెస్కే ప్రసాద్ ఉన్నాడ‌నే అభిప్రాయం జ‌నాల‌లో బాగా ఉంది. దీనిపై తాజాగా స్ప‌దించిన ఆయన జట్టు ఎంపిక అనేది ఒక్కరి వల్లే కాదన్నాడు. మేనేజ్‌మెంట్‌లోని కొందరి వల్లే ఇలా జరిగి ఉండొచ్చన్నాడు. బీసీసీఐ మేనేజ్‌మెంట్‌లో హైదరాబాద్‌కి చెందని ఒకాయన ఉన్నాడని పరోక్షంగా శివలాల్ యాదవ్‌పై రాయుడు ఆరోపణలు గుప్పించాడు. ‘చిన్నప్పుడు జరిగిన పరిస్థితుల వల్ల.. గతంలో ఆంధ్రాకు ఆడటానికి వెళ్లాను. అప్పుడు ఆంధ్రా జట్టుకు ఎమ్మెస్కే కెప్టెన్‌గా ఉన్నాడు. అప్పుడు ఆయన చేసిన పనులు కొన్ని నాకు నచ్చలేదు. దీంతో మళ్లీ హైదరాబాద్‌కే వచ్చాను. ఆయన ఆలోచనా విధానం.. ఆటను చూసే తీరు.. పనులు అప్పట్లో నాకు నచ్చలేదని రాయుడు అభిప్రాయ‌ప‌డ్డారు.
