Brahmanandam : పవన్ కళ్యాణ్, సాయి ధరమ్ తేజ్ ప్రధాన పాత్రలలో సముద్రఖని తెరకెక్కించిన చిత్రం బ్రో. తమిళ మూవీకి రీమేక్గా రూపొందిన ఈ చిత్ర జూలై 28న విడుదల కానుంది. మూవీ రిలీజ్ దగ్గర పడుతున్న నేపథ్యంలో మేకర్స్ మూవీ ప్రమోషన్ స్పీడ్ పెంచారు. మంగళవారం రాత్రి హైదరాబాద్లోని శిల్పకళా వేదికలో జరిగిన ‘బ్రో’ ప్రీరిలీజ్ ఈవెంట్ నిర్వహించగా, ఈ ఈవెంట్లో బ్రహ్మానందం తెగ సందడి చేశారు. వేదికపై వచ్చిన తర్వాత బ్రహ్మానందం.. పవన్ కళ్యాణ్తో తనకు ఉన్న అనుబంధాన్ని గుర్తు చేసుకున్నారు. అంతేకాకుండా, ‘బ్రో’ సినిమా ద్వారా మరోసారి తనకు పవన్ కళ్యాణ్తో నటించే అవకాశం వచ్చిందన్నారు. తాను చేసింది చిన్న పాత్రే అయినా ఎంతో సంతోషంగా ఉందని చెప్పారు.
అభిమానులంతా ఆయనకు గొప్ప విజయాన్ని అందించాలంటూ పరోక్షంగా పాలిటిక్స్ను ఉద్దేశించి కామెంట్ చేశారు బ్రహ్మి. స్పీచ్ మొదలు పెట్టే ముందు.. ‘మిస్టర్ బ్రో.. ఐ లవ్ యు బ్రో.. హేయ్.. దొంగ.. ఐ లవ్ యు.. ఐ లవ్ యు డా’ అని తనదైన శైలిలో అంటూ మైక్ అందుకోగానే పవన్ కళ్యాణ్ను నవ్వించారు బ్రహ్మానందం. మీరందరూ ఇలా చప్పట్లు కొట్టడం కాదు. మీరందరూ మీ ఆశీస్సులు అందజేసి.. పవన్ కళ్యాణ్ విజయానికి అన్ని విధాలా తోడ్పడాలని నేను కోరుకుంటున్నాను. పవన్ కళ్యాణ్ గురించి మాట్లాడగలిగే అతి తక్కువ మందిలో నేను ఒకడినని నేను భావిస్తున్నాను అని అన్నారు. ఇక పవన్ కళ్యాణ్ మంచితనం గురించి కూడా బ్రహ్మి మాట్లాడారు.
‘ఆ మనిషి ఎంతటి మంచి మనిషంటే, ఆయన నవ్వు మీరందరూ చూసే ఉంటారు. పత్తికాయ పగిలినప్పుడు.. తెల్లటి పత్తి బయటికి వచ్చినప్పుడు.. ఆ తెల్లదనంలో ఎంతట స్పష్టత ఉంటుందో.. ఆ తెల్లదనంలో ఎంతటి అందం ఉంటుందో.. అంత అందంగా నవ్వి, నవ్వించగలిగిన మనిషి. మనిషి చూడడానికి అలా సీరియస్గా ఉంటాడు కానీ.. మనిషంతా నవ్వు, మనిషంతా మంచితనం, మనిషంతా హాస్యం, కావాలనుకునేవాళ్లు ఏ రకంగా ఆయన దగ్గరికి వెళ్తే ఆ రకంగా దర్శనం ఇవ్వగలిగిన ఒక దైవాంస సంభూతుడు మా పవన్ కళ్యాణ్’ అంటూ బ్రహ్మానందం ప్రశంసలు కురిపించారు. అయితే, బ్రహ్మానందం పత్తికాయ పగిలినప్పుడు.. తెల్లటి పత్తి అని అనగానే పవన్ కళ్యాణ్ తన ముఖానికి చేయి అడ్డం పెట్టుకుని పగలబడి నవ్వేశారు. ఇందుకు సంబంధించిన వీడియో ఇప్పుడు నెట్టింట వైరల్ అవుతుంది.
