Kasani Gnaneshwar : తెలంగాణ ఎన్నికల వేళ కీలక పరిణామాలు చోటు చేసుకుంటున్నాయి. తెలంగాణ టీడీపీ అధ్యక్షుడు కాసాని జ్ఞానేశ్వర్ పార్టీకి, అధ్యక్ష పదవికి రాజీనామా చేసిన విషయం తెలిసిందే. తెలంగాణ ఎన్నికల భరిలో ఉంటామని ఆశపడిన తెలుగు తమ్ముళ్లకు నిరాశే ఎదురైంది. రాజమండ్రి సెంట్రల్ జైలులో ఉన్న నారా చంద్రబాబు నాయుడుతో కాసాని జ్ఞానేశ్వర్ ములాఖత్ అయి.. తెలంగాణ ఎన్నికల విషయమై చర్చించారు. అయితే.. ప్రస్తుతం ఏపీలో ఉన్న పరిస్థితుల దృష్ట్యా.. తెలంగాణ ఎన్నికలపై దృష్టి పెట్టలేమని.. పోటీ చేయొద్దని చెప్పేశారు. చంద్రబాబు కోరితేనే.. ఖమ్మం మీటింగ్ పెట్టానని కాసాని చెప్పారు.
ఆ తర్వాత నిజామాబాద్లో మీటింగ్ పెట్టాలని చెప్పినట్టు తెలిపారు. ఇంటింటికీ టీడీపీ అని.. 41వ ఆవిర్భావ సభ కూడా పెట్టించారన్నారు. ఈసారి ఎన్నికల్లో అభ్యర్థులు సొంత డబ్బులు ఖర్చు పెట్టుకుని నిలబడాలని నిర్ణయం తీసుకున్నామన్నారు. కానీ.. చంద్రబాబును జైల్లో కలిసినప్పుడు ఎన్నికల్లో నిలబడటం లేదని చెప్పారని తెలిపారు. అసలు తనను ఎందుకు పార్టీలో పిలిచారని అని చంద్రబాబును అడిగినట్టు చెప్పుకొచ్చారు. ఐదేళ్లుగా పార్టీ కోసం పని చేస్తున్న కార్యకర్తలు, అభ్యర్థులు అంతా రెడీగా ఉన్నారని తెలిపిన కాసాని.. వాళ్లకు అన్యాయం చేస్తూ పార్టీలో కొనసాగటం ఇష్టం లేకనే టీడీపీకి రాజీనామ చేస్తున్నానని తెలిపారు. రేపు తన క్యాడర్ను పిలిచి భవిష్యత్ కార్యాచరణ ప్రకటిస్తామని కాసాని స్పష్టం చేశారు.
లోకేష్పై కాసాని జ్ఞానేశ్వర్ తీవ్ర ఆగ్రహం వ్యక్తం చేశారు. లోకేష్ ఎవరికి దొరకరన్నారు. 20 సార్లు ఫోన్ చేస్తే కనీసం ఒక్కసారి కూడా లిఫ్ట్ చేయలేదన్నారు. లోకేష్ చిన్న పిల్లాడిలా మాట్లాడుతున్నారని అసహనం వ్యక్తం చేశారు. హైదరాబాద్లోనే ఉన్నా లోకేష్ తనను పట్టించుకోలేదన్నారు. లోకేష్ ఎందుకు ఇక్కడ పెత్తనం చేస్తున్నారని ప్రశ్నించారు. పోటీ చేయొద్దని ఎలా చెబుతారని ఆవేదన వ్యక్తం చేశారు. మరోవైపు బాలకృష్ణ కూడా చిటికెలు వేశాడు.. పోయాడంటూ ఆగ్రహం వ్యక్తం చేశారు కాసాని. ఆ దొరలు ఫోన్ చేస్తే లిఫ్ట్ చేయరని ఆవేదన వ్యక్తం చేశారు.
