Pawan Kalyan Ennikala Ratham : ప‌వ‌ర్ స్టార్ పవన్ కళ్యాణ్ యుద్ధానికి సిద్ధ‌మ‌వుతున్నారు. ఒక‌వైపు సినిమాలు చేస్తూనే మ‌రోవైపు రాజ‌కీయాల‌లోను తన స‌త్తా చాటాల‌ని డిసైడ్ అయ్యారు. 2019 ఎన్నికల తర్వాత జనసేన అధినేత పవన్ కళ్యాణ్ తన పంథా మార్చుకొని ముందుకు సాగుతున్నారు. ఈ సారి ఎలా అయిన జ‌గ‌న్ ప్ర‌భుత్వాన్ని గ‌ద్దె దించేందుకు కృషి చేస్తున్నారు. ఎన్నికల కోసం ముందే గ్రౌండ్ ప్రిపేర్ చేసుకుంటున్నారు. గతంలో బస్సు యాత్ర ఉంటుందని ప్రకటించినా.. ఆ తర్వాత వాయిదా ప‌డ‌గా, ఇప్పుడు ఏపీ రాష్ట్రవ్యాప్తంగా పర్యటనకు సిద్ధమయ్యారు. ఓ వాహనాన్ని కూడా సిద్ధం చేసుకున్నారు. ఈ వాహనానికి వారాహి అని పేరు నిర్ణయించారు.
ఈ వారాహి వాణంకు చాలా ప్రత్యేకతలు ఉండ‌గా, ఇందులో స్పెషల్‌గా లైటింగ్.. ఆధునిక సౌండ్ సిస్టమ్స్ అందుబాటులో ఉంటాయి. అంతేకాదు ఈ వాహనాన్ని ప్రత్యేక భద్రత చర్యలతో పాటూ లేటెస్ట్ టెక్నాలజీతో సిద్ధం చేశారు. పవన్ కళ్యాణ్ పర్యటనల మయంలో గతంలో విద్యుత్ నిలిపివేసిన సందర్భాలు ఉన్నాయి. ఈ క్ర‌మంలోనే వారాహి వాహనంలో ప్రత్యేకంగా లైటింగ్ ఏర్పాట్లు చేశారు. ఈ వాహనం నుంచి పవన్ కళ్యాణ్ ప్రసంగించే సమయంలో లైటింగ్ పరమైన ఇబ్బందులు లేకుండా వాహనం చుట్టూ లైట్లు ఏర్పాట్లు చేసిన‌ట్టు తెలుస్తుంది. జనసేనాని ప్రసంగం వేల మందికి స్పష్టంగా వినిపించే విధంగా ఆధునిక సౌండ్ సిస్టం ఏర్పాటుచేశారు.
వారాహికి నలువైపులా సీసీ కెమెరాలు అమర్చారు. 2008 నుంచి ఇప్పటి వరకు పవన్ కళ్యాణ్ పర్యటనల్లో ఎదురైన అంశాలని దృష్టిలో ఉంచుకొని అన్ని భ‌ద్ర‌తా ఏర్పాట్ల‌తో ఈ వాహనాన్ని రూపొందించారు. వాహనం లోపల పవన్ కళ్యాణ్‌తో పాటు మరో ఇద్దరు కూర్చొని చర్చించుకునే అవ‌కాశం ఉండ‌గా, అక్కడి నుంచి హైడ్రాలిక్ విధానంలో మెట్లు ఉంటాయి. వాటి ద్వారా వాహనం మీదకు చేరవచ్చు. జగిత్యాల జిల్లా కొండగట్టు క్షేత్రంలోని శ్రీ ఆంజనేయ స్వామి ఆలయంలో ప్రత్యేక పూజలు చేయించాల‌ని నిర్ణ‌యించుకున్న‌ట్టు తెలుస్తుంది. మొత్తం మీద ఓ మిలటరీ కవాతు..పవన్ కళ్యాణ్ యుద్దానికి వెళ్తున్న ‘సినిమా’ కలరింగ్ అయితే వారాహికి సంబంధించిన వీడియోలో ఇచ్చారనే చెప్పాలి.
