Rashmika Mandanna : కిరిక్ పార్టీ అనే కన్నడ చిత్రంతో కెరీర్ స్టార్ట్ చేసిన రష్మిక మందన్న.. టాలీవుడ్ లోకి ఛలో సినిమాతో అడుగు పెట్టింది. ఆ సినిమా హిట్ కావటంతో పాటు గీత గోవిందం బ్లాక్ బస్టర్ అయ్యింది. అనంతరం వరుస సినిమాలు చేస్తూ స్టార్ హీరోయిన్ గా ఎదిగింది. ఇటీవల పుష్పతో పాన్ ఇండియా హీరోయిన్ గా పేరు సంపాదించుకుంది. ఓ వైపు దక్షిణాది సినిమాలతో పాటు బాలీవుడ్లోనూ రష్మిక క్రేజీ సినిమాల్లో నటిస్తుంది. అయితే ఈమె వ్యక్తిగత జీవితంలోనూ కొన్ని విమర్శలు వచ్చాయి. రక్షిత్ శెట్టితో నిశ్చితార్థం క్యాన్సిల్ అయినప్పుడు సదరు హీరో ఫ్యాన్స్ రష్మికను తెగ ట్రోల్ చేశారు. తర్వాత విజయ్ దేవరకొండతో డేటింగ్ చేస్తుందంటూ కూడా వార్తలు వచ్చిన్నప్పుడు కూడా రష్మిక ట్రోలింగ్ను ఫేస్ చేసింది.
ఇప్పటివరకు ట్రోల్స్ భరించిన రష్మిక.. తాజాగా తన మనసులోని బాధను సుధీర్ఘ నోట్ ద్వారా అభిమానులతో పంచుకుంది. గడిచిన కొన్ని రోజులు, వారాలు, నెలలు లేదా సంవత్సరాలుగా విషయాలు కొన్ని నన్ను ఇబ్బంది పెడుతున్నాయి. వాటికి ముగింపు చెప్పాలని అనుకుంటున్నాను. నిజానికి ఈ పనిని ఎప్పుడో చేయాల్సింది. కాస్త లేట్ అయ్యింది. నేను నటిగా కెరీర్ ప్రారంభం చేసినప్పటి నుంచి కొందరు నన్ను ద్వేషిస్తున్నారు. కొందరైతే దారుణంగా ట్రోలింగ్ చేశారు. వారి చర్యలు ఇప్పటికీ నన్ను ప్రశాంతంగా ఉండనివ్వటం లేదు. మీరందరూ గర్వపడేలా నటించాలనే అడుగులు వేస్తున్నాను.
అయితే ఇలాంటి ట్రోల్స్ అడుగడుగునా అడ్డుపడుతుంటే అనుకున్న లక్ష్యాన్ని ఎలా సాధిస్తాను అని ఓ లెటర్ను సోషల్ మీడియాలో షేర్ చేసింది రష్మిక. ఇప్పుడా లెటర్ నెట్టింట తెగ వైరల్ అవుతుంది. ఇప్పుడు దానికి కాంతార సినిమానే కారణమనే మాట వినిపిస్తోంది. తాజాగా విమానశ్రయంలో కనిపించిన రష్మికకు.. కాంతార సినిమా చూశారా అని రిపోర్టర్ల నుంచి ప్రశ్న ఎదురైంది. చూడలేదు, త్వరలో చూస్తాను అని ఆమె సమాధానమిచ్చింది. దీంతో ఆమెపై కన్నడ నెటిజన్లు విమర్శలు చేయడం మొదలుపెట్టారు. స్టార్ హీరోయిన్ అయిపోయేసరికి ఆమె మూలాలు మర్చిపోయిందని, ప్రపంచం మెచ్చిన కాంతారని ఆమె చూడకపోవడం ఏంటి? అని మరోసారి రచ్చ రచ్చ చేస్తున్నారు నెటిజన్లు.
